«Астана» баскетбол клубы Қазақстан Ұлттық Лигасы 2025/2026 жылдар маусымы тұрақты чемпионатындағы жарыс жолын бастайды. Команда маусымдағы алғашқы ойындарын Атырауда жергілікті «Барсы Атырау» ұжымына қарсы өткізеді. 

Кездесулер 18-19 қазан күндері «Airom Arena» алаңында өтеді. Бұл – «Астананың» жаңа маусымдағы алғашқы ойындары, ал атыраулық ұжым болса, «Каспийге» қарсы екі матч өткізіп үлгеріп, екеуінде де жеңіске жетті. 

Кездесулер тарихы

Командалар осыдан біраз уақыт бұрын Атырауда 2025 жылғы Қазақстан Кубогы аясында кездескен. Топтық кезеңде «Астана» 28 ұпай айырмашылығымен сенімді жеңіске қол жеткізді – 88:60. 
2014/2015 жылдар маусымынан бастап екі клуб өзара 71 рет кездесіп, оның 60-ында астаналық ұжым жеңімпаз атанған. 
Командалардың көшбасшы ойыншылары

Биылғы тұрақты чемпионатта «Астана» сапынан көшбасшы ойыншылар анықтала қойған жоқ. Дегенмен, биылғы Қазақстан Кубогы нәтижесінде бұл рөлді турнирдің үздік ойыншысы атанған Асқар Майдекин алуы мүмкін. 

«Abu Dhabi International» жолдастық турнирінде Адас Юшкявичюс, Эрик Дэй мен Роберт Пан ерекше көзге түсті, ал Руслан Айтқали мен Асқар Майдекин команданың көшбасшылық орнын нығайта түсті. 

«Барсы Атырау» құрамынан Майкл Майс (орат есеппен әр ойында 29.5 ұпай, 5.5 пас) пен допты алу бойынша Есет Жарқылов (әр матчтар орта есеппен 11) үздік ерекше көзге түсіп жүр. 

Руслан Айтқали, «Астана» БК шабуылшысы:

- «Барсы Атырау» есепке қарамастан, соңына дейін талас жүргізетін команда. Олар әр доп пен алаңның әр сантиметрі үшін күрес жүргізеді. Бұған дейін Қазақстан Кубогында және Абу-Дабидегі жолдастық турнирде бақ сынадық, осы аралықта бір-бірімізге үйреністік, өзара түсіністік пайда болды. Бұағн дейін командадағы біраз ойыншы бір-бірімен бірге ойнаған, сондықтан үйренісу қиын болған жоқ. Маусымның басталуын үш ай күттік, сондықтан күре жүргізуге дайынбыз! 

«Барсы Атырау» командасымен матчтар 18-19 қазан күндері өтеді, ойындар сағат 17:00-де басталады. 
Ойындарды клубтың ресми сайтынан тікелей эфирде көруге болады.

«Астана» Қазақстан Ұлттық Лигасы жаңа маусымын Атырауда бастап, қос жеңіске қол жеткізді. Ойындар 18-19 қазан күндері өтті.

Алғашқы кездесуді астаналық баскетболшылар сәл сенімсіздеу бастағанымен, ойын тізгінін өз қолына және бақылауына ала білді. Бірінші ширектің қорытындысында «Астана» айқын басымдық көрсетті – 13:28. Екінші және үшінші он минуттықтарда командалар алма-кезек шабуыл алмасып, кезеңдер бір ұпай айырмашылығымен аяқталды – 19:21 және 15:14. Алайда қорытынды ширекте Рамунас Цвирка шәкірттері тағы да басымдық танытты – 14:24. Осылайша, «Астана» қорытынды 61:87 есебімен маусымдағы алғашқы жеңісіне қол жеткізді.

25 ұпай еншілеп, 6 рет допты алған Роберт Пан кездесудің үздік ойыншысы атанды. Астаналық ұжымның жаңа ойыншысы Эрик Дэй де өзін жақсы қырынан көрсете білді – 23 ұпай, 3 рет допты алу мен 6 пас. Үздік үштікті Асқар Майдекин түйіндеді – 13 ұпай және 5 рет допты алу.

Екінші ойында «Астана» алғашқы кездесуден де сенімді ойын өрнегін көрсетті. Елордалық ұжым барлық төрт ширек бойы кездесуді өз бақылауында ұстады – 12:25, 19:28, 22:24, 11:22.
Дабл-дабл (22 ұпай, 10 пас) жасаған Эрик Дэй тағы да команданың матчтағы үздік ойыншысы атанды.

«Астананың» барлық дерлік ойыншысы осы кездесуде ұпай еншіледі. Олардың арасында ерекше нәтиже көрсеткендер:
Роберт Пан – 16 ұпай, 3 рет допты алу, 2 пас
Адас Юшкявичюя – 11 ұпай, 5 пас, 3 рет допты алу
Александр Жигулин – 10 ұпай, 5 рет допты алу, 4 пас
Асқар Майдекин – 9 ұпай, 7 рет допты алу, 3 пас

Рамунас Цвирка шәкірттері Атырауда екі сенімді ойын өткізіп, маусымдағы алғашқы жеңістеріне қол жеткізді.
«Астана» сырт алаңдағы сапарын жалғастырып, 26-27 қазанда «Тобылға» қарсы ойнайды.